ဝတ်ရုံမည်းတွေရဲ့  အနာဂါတ်သင်းသတ်ရုံရှေ့ 
အပူလှိုင်းငွေ့ တွေနဲ့ 
မူးမေ့ရူးသွပ်မတတ်
ဘယ်ရာဇသတ်ကိုမှ မကိုင်းရှိုင်းနိူင်တော့တဲ့
အရူးတစ်ပိုင်း မိန်းမရိုင်းကြီး
ရင်ဘတ်ကိုစည်တီး...တီး...ပြီး
လောင်မီးမြိုက်မြိုက်ငိုချင်းတစ်ပိုဒ်က
စိတ်လိုက်မာန်ပါ ကျူးရင့်လာသည်
“ငါသည်...
တရားမင်သော မိခင်
ညစ်နွမ်းမှုတွေ စွန်းထင်ပြီး
မသန့် စင်တဲ့
နင်တို့ ရဲ့ စစ်ခုံးရုံး ပျက်သုဉ်းပါစေ”
မိခင်ရဲ့ ရွာရိုးရွာစဉ်
ခေါင်းလောင်းထိုးသံက မချိုလွင်
ကျေးငှက်တွေရဲ့ သံစဉ်လည်းမကြား
တစ်ဝမ်းတစ်ခါးအတွက်ပင်
ရတက်က မအေးရွှင်
စပါးတလင်းထက်ပင်
နေ့ ခင်းဘက်မိုးသက်ကယ်လေနှင်
ရင်ပြင်မှာ သားပျောက်ဒဏ်ရာတွေက အပိုနှိပ်စက်
အအိပ်ပျက် အစားပျက်
စိတ်မသက်သာစရာနေ့ ရက်တွေကများ
အဆိပ်တက်လေတဲ့ ကာလသုံးပါး
အရှုံးများနဲ့ လူမင်းတစ်သိုက်
ဆက်မိုက်နေတုန်း
ကြွေလေဦး ကြယ်နီတွေ
အမေတွေလည်း အသိုက်ပျက်
အမိုက်မဖက်တဲ့အဆွေ ကျူးရင့်လေသည်
“ ငါသည်...
တော်လှန်သောမိခင်
သွေးစိမ်းရှင်ရှင် စွန်းထင်းပြီး
မသန့် ရှင်းတဲ့
ဒင်းတို့ ရဲ့ အလံ အကျမြန်ပါစေ၊ ”
ငြိမ်းချမ်းရေးအတွက်
တရားမဖက်တဲ့ ဓါးရွက်တွေကိုပဲ
တလက်လက်ဖြစ်အောင်သွေး
အဖမဲ့ကလေးတွေလည်းမွေးထုတ်
ကြိုးရှုပ်သွားတဲ့ ယမင်းရုပ်တွေ
ဘ၀ရဲ့ အနှုတ်ရက်တွေဖြတ်သန်းဘို့ 
လောကခရီးလမ်းတို့ က ကြမ်းတမ်း
အမေတွေတောင်မလွမ်းတတ်တဲ့ ဖခင်ပုံစံ
သစ္စာအမှန်ဟာ ဟိုး...ဟို...အဝေး
မနွေးထွေးတဲ့ မေတ္တာအရင်းခံနဲ့ 
ဘာမှမကျန်အောင် အသိုက်အမြုံတွေကိုလောင်တိုက်သွင်း
မှောင်မိုက်ခြင်းရဲ့ လမ်းဆုံး
အမေ အလွန်မုန်းစစ်ဝါဒီ
သည်းညှာမှသည် ကျူးရင့်ချေပြီ
“ ငါသည်...
စိမ်းလန်းသောမိခင်
ဓါးနဲ့ ယှဉ်လျက်ထားတဲ့
ဒင်းတို့ ရဲ့ အချုပ်အချာအာဏာစက်
အလဲလဲ အ၀က်ဝက် ကွဲပျက်ပါစေ၊ ”
ဒင်းတို့ ရဲ့ 
တရားကပင် ရှုံးတဲ့ စစ်ခုံရုံး
အကျအဆုံးတဲ့နေ့ ။
ဒင်းတို့ ရဲ့ 
ယမ်းနံ့  သွေနံ့ ဝေလူနေတဲ့အလံ
မြေမှာသက်ကျံတဲ့နေ့ ။
ဒင်းတို့ ရဲ့ 
သစ္စာမဖက်တဲ့ အချုပ်အချာအာဏာစက်
အလဲလဲ အ၀က်ဝက် ကွဲပျက်တဲ့နေ့ 
ရင်ကိုလာဝှေ့ မဲ့ ရင်ငွေ့ မဲ့သားတွေကို
ရွှေရင်တဖိုဖိုနဲ့ 
နေပျိုချိန်ဆို အမေအိုတွေ ကြိုနေလေရဲ့ 
“ သားတို့ ရေ
မဖောက်ပြန်တဲ့ သစ္စာအမှန်တွေကို ရင်ဝယ်ပိုက်ထား။
အမြိုက်တရားတွေကိုလည်း
ငမိုက်သားတွေအတွက် ယူဆောင်ခဲ့။
အပူရောင်တရားတွေကိုလည်း
အယူသည်းပြီး မသရဇ္ဇယ် ညည်းလေနဲ့ 
ကောင်းကင်ဗွေ ဝေယံဆီ
ခွပ်ဒေါင်းတောင် အောင်လံနီကို
အမြင့်မားဆုံးလွှင့်ချီပြီး
အမေ့ရဲ့ သားပျောက်အပူမီးတွေကို
ကူပြီးငြှိမ်းလှည့်ပါတော့၊ ”
No comments:
Post a Comment